افيدينا ببرنامجك في رمضان حبيبتي

االسلام عليكم ورحمة الله تعالى وبركاته اخواتي العزيزات بودي ان اقترح موضوع اتمنى انه نلقاو فيه المنفعة
هو للدردشة ولكن اظن انه سنستفيد منه جميعا وهو اقترح ان كل واحدة من الاخوات تطرح معنا برنامجها لشهر رمضان
على سبيل المثال كيفاش العضوة جوز نهارها في رمضان بين الطبخ والاعمال المنزلية والصلاة وحفط القران
باختصار اود ان كل واحدة فينا تعطينا برنامجها الخاص بها سواء كانت متزوجة او عزباء من اجل ان نتبادل الافكار حول ضبط البرنامج كما اني اقترح لو انه يتم ضبط برنامج موحد بيننا لكي نتمكن من الدخول الى المنتدى في وقت محدد للاستفادة اكثر والبرنامج تقسمه الى قسمين اي نضع له برنامجين للعاملات وللماكثات في البيت حتى انشاء الله نتمكن من الاجتماع اكثر  وتكون عندنا فرصة للدردشة اكثر
على كل حال اعلم انه ماراجش نتلاقاو كامل في وقت واحد هذا اكيد ولكن بتوحيد برنامجنا راح نتبركجو اكثر وكل وحدة تروح للبرنامج اللي ساعدها واذا ما قدرناش نجمعوا كامل الاعضاء فعلى الاقل الحد الادنى معليش

واش رايكم حبيباتي .................
انتظر ردودكم
السلام عليكم ورحمة الله وبركاته

شكرا حبيبتي على الموضوع الرائع ان شاء الله كل اخت تحضر ونتحدث كلنا باذن الله

وانا ان شاء الله راح احط موضوع يمكن كل الاخوات تدخل وتشارك معنا

بسم الله رحمن الرجيم السلام عليكم حبيباتي جميعا اهنئ نفسي واهنئ اخواتي حبيبات بشهر شعبان لهذا العام واتمنى ان نصوم رمضان في خير وامان وسلام لكل الامة الاسلامية ونصرا قريبا مباركا لكل اخواننا في سوريا الحبيبة وفلسطين الشقيقة مصر الرفيقة وليبيا الجارة والصديقة
قولوا اميييييييييييييييين
اولا احب ان اذلعكم على البرنامج الخاص بي في شهر رمضان مند ان كنت عازبة الى ان تزوجت وانجبت وانا على هذا البرنامج رغم بعض الصعوبات التي واجهتني العام الماضي مع ابنتي الصغيرة ولكن الحمد لله
استيقظ صباحا عند السحور اجهز السحور لزوجي -طعام بالزبيب واللبن او مسفوف عادي - بعدها نذهب نصلي سويا قبيل اذان الفجر وبعذ الاذان والصلاة نجلس نقرا ما تيسر من القران الى طلوع الشمس بعدها نصلي ركعتين يذهب زوجي الى النوم لادخل انا الى المطبخ واغلق الباب وزائي حتى لا تستيقظ ابنتي ابدا بتحضير الشوربة والطبق الرئيس السلطة والبوراك - راني معولة انشاء الله هذا رمضان نحضر خبز الدار - ونطيب كل شيء ونخليهم يبردوا باش نديرهم في الثلاجة بعدها نغسل الاواني ونمسح المطبخ ونغلقوا تكون حوالي الساعة التاسعة والنصف العاشرة بعدها نوض بنتي وندوش لها مليح مليح نعطيها تشرب حليبها بالقاطو ونروحو للغرفة نتاعها هي تلعب وانا نخمل ونقوم بالاعمل المنزلية الاخرى متبقية من غسل الملابس والمسيح والتحمال في هذا الوقت ينوض زوجي وبما انه صحفي يبدا خدمتوا في الميكرو انا المهمة انتاعي تخلاص عند صلاة الظهر نكون اعطيت لابنتي الغذاء ودخلتها في مكان النوم انتاعها انصلي الظهر والسلام عليكم انولي ما نعقل حتى واحد في اغلب الاوقات بنتي ما تحبش ترقد نخليها مع باباها وانا لازم نرقد انوض على العصر نصلي ونروح كاش ما نخلط في المطبخ من حلوى ولا فلان او اي شيء وقبيل المغرب بنصف ساعة نخرج الماكلة من الثلاجة وندفيها على النار ونوجد طاولة الاكل -زوجي ما يحبش الماكلة سخونة والا يخبط عليا الطابلة وما فيها - في هذا الوقت نشمخ الكسكسي منبعد نصلوا المغرب جماعة مع زوجي ونفطروا من بعد نغسل الماعن ثم ثم ونفس الوقت راني نفور في الكسكس للمرة الاولى ونزيد الجلبانة والفول اللي كنت جمدتوا في وقت سابق او الزبيب ونمسح من اجل فتات الاكل اللي طاح في الارض ندخل للدوش انا وابنتي في هذا الوقت زوجي يخرج من الدار نتفرج شويا التلفاز ونطفي الاضواء باش ترقد بنتي وانا كذلك
الا ان تلحق وقت اللي يجي فيه زوجي حوالي منتصف الليل نسخن شويا الماكلة اللي كانت بقات من الفطور يكولها ويروح يتفرج او يرقد وانا نعاود نوض على السحور باش نفور الكسكسي للمرة الثانية
هذا هو برنامجي لشهر رمضان
اللهم امنحنا القدرة على صوم شعبان وبلغنا اللهم رمضان اميييييييييييييييييييين يارب العالمين            

السلام عليكم الحمد لله  والصلاة  والسلام على رسول الله انا في هدا الشهر انهض صباحا حوالي الثامنة  نفطر ولدي ونشعلو التلفاز ونهز لفراش حتى يزيدو ينودو خاوتو عندي3 اكبرهم 12 سنة والصغير عامين نسيق الدار و ادا عندي القش نغسل في الماشينة  ونخبز الكسرة الرخسيس   نغسل السلطة ونوجد العقدة تاع البوراك وننصب الفطور وانقص عليه ونحط ولدي الصغير يقيل وبعدها نصلي الظهر ونقرا شوية في المصحف  ونقيل شوية ادا خلاوني اولادي الكبار نرقد  انهض مع العصر اصلي ونزيد نقرا في المصحف ادا خلاني ولدي الصغير وندخل نكمل فطوري حتى المغرب نصلي انا وزوجي وولديا نغسل الماعن وزوجي يدهب مع ابني الاكبر للتراويح ونبقئ مع الصغار ادا كانت الحرب بينهم فصلاتي حتى عودة زوجي وادا كانت هدنة نصلي العشاء والتراويح واستسلم للنوم حتى استطيع النهوض للسحور نسحر مع زوجي نقراو قران مع التسبيح والدعاء حتى وقت الصلاة  يدهب زوجي للعمل لانه يعمل باكرا 5 صباحا وانام انا قبل انيستيقظ ولدي الصغير وهدا برامجي ها العام مند ان ازداد ولدي الصغير  والسلام وصحا فطوركم

اهلا حبيباتي
هذا برنامجي  انهض في السحور نوجد السحور  ثم نوض اولادي وزوجي وزوجة ابني نتسحر كلنا

ومن بعد نغسل الماعن انا او زوجة ابني ثم نروح نصلي ركعتين  ونقرا شوية في المصحف  ثم لما ياذن الفجر نصلي ثم نقرا شوية في المصحف

ونروح نرقد ثم نوض على السابعة نتوضا ونصلي ركعتين ونقرا شوية في المصحف لما تنوض عروسي تبرز وتسيق وانا اذا كان عندي شغل اخر نقضيه

ومن بعد نصلي الظهر ونقرا شوية في المصحف  ثم اذا خلاني حفيدي نرقد شوية ثم نوض نصلي العصر  ونقرا شوية في المصحف

ثم تنوض عروسي توجد الفطور وانا نعجن المطلوع
ونطيبو ثم لما نفطر  ونصلي نروح الى المسجد ونصلي صلاة التراويح هذا العم برك لي بديت نروح للمسجد لاني وليت جدةههههههههههههه

ولما نرجع ناكل كاشما ديسير  ثم نرقد ان شاء الله نكون افدكم

انا في رمضان تنوضني ماما للسحور نسحر بعدها نقرا شوية قران و كي ياذن نصلي الفجر و نقرا شوية قران بعدها نروح نرقد شوية
انوض على 6:30 نغسل الماعن بعدها نوجد روحي باش نروح للخدمة نخرج من الخدمة على 13:30 نوصل للدار ندوش نصلي الظهر نقرا شوية قران نرقد شوية نريح بعدها  للمطبخ نتعاونو انا و اختي الصغيرة نطيبو الفطور كي ياذن العصر نصلي بعدما يوجد الفطور نقرا شوية قران كي يقرب وقت اذان المغرب  نوجدو انا و اختي الطاولة كي ياذن نصلي نفطر نتفرج شوية بعدها نغسلو الماعن انا و اختي كي تاذن العشا نصلو جماعة انا و اختي و بنات عمي و نصلو التراويح بالبيت و ندعو بعدها نروح نرقد تصبحو على خير